SAUK TV-nuus ly swaar onder staking

Twee van die vakbonde wat SAUK-werknemers verteenwoordig het vandag met ‘n wegbly-aksie van twee dae begin. Sommige van die SAUK se nuusprogramme is negatief geraak. Die nuus en aktualiteitsprogram op Nkosi FM, die SAUK se radiostasie wat Zoeloesprekende luisteraars bedien kon nie vandag uitgesaai word nie. Die staking het ook sy merk gelaat op vanaand se nuusuitsending van die Afrikaanse Nuusbulletin om seweuur vanaand. Die uitsending het later as normaal begin, daar was baie advertensies vertoo, slegs enkele berigte is gebeeldsend en slegs die helfte van die bulletin is uitgesaai. In die tyd wat die tweede Helfde uitgesaai moes word is ‘n string advertensies, ‘n woordelose weervoorspelling en ‘n lokprent vir die film Harry Potter and the Halfblood Prince vertoon. Al die ander vooraf verfilmde programme het gelukkig voortgegaan soos normaal. Gelukkig is uitsendings op Radio Sonder Grense nie geraak nie.
Televisiedienste is dikwels meer gevoelig vir so ‘n staking omdat daar meer tegniese personeel by ‘n televisie-uitsending betrokke is. Ek hoop net dat die SAUK en vakbonde spoedig tot ‘n vergelyk kan kom oor hulle loondespuut. Daar is natuurlik ook sommige onder ons wat bly is omdat die ANC se propagandasmoel gedeeltelik stil was. Ek kan nogal met hulle simpatiseer. Ek moet erken hierdie staking laat my kriewelrig voel. As die SAUK se uitsendings heeltemal moet gaan staan, sal ons van onafhanklike media en die internet afhanklik wees vir ons nuus. Kom ons hoop vir die beste.

Advertisements

SAUK-krisis laat gewilde tv-program sneuwel

Vyftig/vyftig, die gewilde televisieprogram oor die natuur en omgewingsake, gaan vanaf die kassie verdwyn nadat die SAUK nie die program se kontrak hernu het nie. Volgens die aanbieder, Johan Botha, sou die program ‘n ruskans geneem het tot Oktobermaand toe sodat kwessies rondom die kontrak uitgeklaar kon word. Die SAUK was die laaste paar weke baie stil oor die kontrak en die span van Vyftig/vyftig het vandag verneem dat die kontrak nie hernu sal word tot April volgende jaar. die SAUK BEWEER HULLE WIL DIE PROGRAM VOLGENDE JAAR WEER GEBRUIK OM MET sUID-aFRIKA TE SPOG WANNEER DIE GROOT 2010 SOKKERTOERNOOI HIER AANGEBIED word. Johan Botha is egter skepties oor die SAUK se benadering omdat dit ‘n ernstige ontwrigting vir die produksiespan is. Nou is hulle vir alle praktiese doeleindes werkloos. Omgewingsjoernalistiek is ‘n gespesialiseerde veld en mense soos hulle kry nie maklik op ander plekke werk nie. Omdat die SAUK se geldkrisis die onafhanklike produksiemaatskappye ook nadelig raak, is dit ook moeilik vir hulle om daar werk te kry.
Hierdie program het baie gedoen om mense op te voed oor ons ryk natuurlewe en ook diegene aan die kaak gestel wat ons omgewing bedreig het met hulle besoedeling en onverantwoordelike ontwikkelingsprojekte. Wie gaan dit nou doen juis in ‘n tyd waar veral mynbesoedeling aan die Wesrand geweldig toeneem?
Die laaste uitsending is geskeduleer vir 6 Julie.

SAUK in die knyp

Die SAUK is die laaste tyd in ‘n diep geldelike verknorsing. Daar word bereken dat die SAUK se skuld sowat R800 miljoen beloop. Die SAUK-bestuur ontken dit heftig, maar erken darem dat hulle sogenaamde begrotingsprobleme het. Die SAUK het het op ‘n stadium vir maande nie die produksiehuise se rekenings betaal wat verantwoordelik is vir die vervaardiging van gewilde sepies op televisie soos Sewende Laan, Generations en Isidingo. Dit het tot gevolg gehad dat hierdie sepies amper van die lug verdwyn het omdat die produksiehuise gedreig het om opnames van die programme terug te hou indien die SAUK sou weier om sy rekenings te betaal. Sewende Laan se rekening is gelukkig betaal, maar daar is nog heelwat ander diensverskaffers wie se rekenings nog agterstallig is. Intussen het die SAUK ‘n moratorium van drie maande ingestel vir die goedkeuring van nuwe televisiereekse vir al drie televisiekanale. ‘n Glansplegtigheid, Stars of Mzanzi, moes ook onbepaald uitgestel word.
Om alles te kroon, het vakbonde wat personeel van die SAUK verteenwoordig gister ‘n sertifikaat van die Komissie vir Bemiddeling, Arbitrasie en Rekonsiliasie gekry vir ‘n beskermde staking oor salarisse. Die SAUK-bestuur wil ‘n interdik verkry om hierdie staking te keer, maar het die publiek verseker dat gebeurlikheidsplanne in plek is indien die staking wel voortgaan.
Agt van die twaalf raadslede van die SAUK-raad het alreeds bedank en daar is groot druk op die oorblywende vier raadslede om ook te bedank.
Ek sien alreeds hoe die mense steen en been gaan kla oor al die heruitsendings van televisieprogramme as hierdie situasie so voortgaan.