Windows 8 Is Op Pad

Maart 1, 2012

Die rekenaarprogrammatuurreus Microsoft het op Skrikkeldag, 29 Februrarie 2012, vir groot opgewondenheid gesorg nadat hulle ‘n toetsweergawe van Windows 8 by die Mobile World Congress in Barcelona, Spanje, bekendgestel het.
So ver is hierdie toetsweergawe, ook bekend as die “beta” weergawe van die Windows 8 bedryfstelsel al deur mense in meer as 70 lande afgelaai om getoets te word.
Hierdie bedryfstelsel kan op gewone rekenaars, skootrekenaars en tabletrekenaars werk. Dit is dus nie meer nodig vir Microsoft om verskillende bedryfstelsels vir gewone rekenaars en tabletrekenaars te skryf nie.

Microsoft beweer dat Windows 8 op ‘n gewone rekenaar slegs 8 sekondes neem om ten volle te laai as die rekenaar aangeskakel word. Indien dit wel so realiseer sal dit absoluut alle rekords breek vir die bedryfstelsel met die vinnigste aanskakelspoed. Die meeste bedryfstelsels wat tans beskikbaar is neem romdom 30 sekondes om aan te skakel en te laai.

Windows 8 doen weg met die gewone Windows kieslys en maak gebruik van ‘n ontwerp waar programme amper soos ‘n mosaiek van teëls op die rekenaarskerm vertoon word. Diegene van julle wat al mosaiek kunswerk gesien het sal weet waarvan ek praat. Die teëls op die skerm lyk amper soos padtekens. Programme kan oopgemaak word deur met jou vinger op die skerm te raak waar die toepaslike programme se teëls vertoon word mits jy ‘n rekenaar met ‘n raakskerm het. Jy kan egter ook met jou muis kliek om programme oop te maak as jy nie ‘n raakskerm wil gebruik nie.

Hierdie nuwe soort ontwerp kan dalk ernstige uitdagings stel vir maatskappye en organisasies wat skermlesers vir gesiggestremde en leesgestremde rekenaargebruikers skryf. Hierdie groepe is veral afhanklik van kieslyste wat met ‘n toetsbord genavigeer word. Microsoft sal daaraan moet dink om regtig saam te werk met hierdie organisasies om alternatiewe te vind wat dit vir hierdie organisasies en maatskappye moontlik sal maak om die nuutste skermlesers te kan skryf wat met gemak deur hierdie kwesbare groeperings gebruik kan word. Heelparty mense se werksekerheid hang daarvan af. dit het al in die verlede gebeur dat veral gesiggestremdes hul werk verloor het omdat hulle spraakprogramme nie versoenbaar was met die maatskappy se bedryfstelsel nie.

Ek is nogal nuuskierig om te lees wat die gewone mense wat bevoorreg is om hierdie bedryfstelsel te kan toets daarvan dink. Ek sal beslis die webjoernale dophou vir enige verdere nuus.

5 Responses to “Windows 8 Is Op Pad”


  1. Hierdie is beslis slegte nuus, vir iemand wat nog op windows 2003 werk, en nou begin droom het oor ‘upgrade’ na 2007😦
    Ag, nou ja…..buiten vir ‘valletjie’ is daar niks waarvoor ek skrik nie!

    Het net kom inloer, regtig, tot omtrent 2 maande gelede, het ek nie eers geweet daar is soveel Afrikaanse blogs…en droom nou nog om myne ‘volstoom’ aan die been te kry!

    Lkr dag!

    Like

    • Johan Pieterse Says:

      Naand Loli. Welkom op my blog. Jy kan enige tyd kom inloer. Raak jy nie nou deurmekkar met Microsoft Office nie. Die datums en nommers wat jy gee klink soos Office. Ek is self maar bietjie agter, gebruik nog Windows XP terwyl die res al aanbeweeg het na Windows Vista en 7. Hier is ‘n groot hoeveelheid Afrikaanse blogs jong, jy sal verbaas wees. Sterkte met jou eie blog.

      Like


      • Ja, Johan, ek is seker deurmekaar. Wat is ‘n vinnige manier om die Afrikaanse blogs op te spoor? En hulle posts te kry. Op WordPress, wou ek Afrikaans volg, en nou kry ek al die Engelse top blogs??
        Eerlik, ek het nie eers ‘n vriendin wat self blog wat ek kan vra nie, maak maar staat op my ander bloggermaats se raad….
        Raad asb!

        Like

  2. Johan Pieterse Says:

    Om die Afrikaanse WordPress.com blogs te volg, besoek die volgende webadres http://af.wordpress.com

    Like

  3. Johan Pieterse Says:

    Vir Afrikaanse blogs op WordPress.com, Blogger, Letterdash, Posterous en ander onafhanklike webblaaie, besoek die volgende webadres http://www.blik.co.za Ek is wel nie ‘n kenner van blogs nie, maar sal graag help waar ek kan.

    Like


Comments are closed.

%d bloggers like this: