Kom ons maak somme

Junie 14, 2010

In een van my vorige inskrywings het ek gemeld hoe moeilik dit is vir veral gesiggestremdes om captchas in te vul as hulle wil aansoek doen vir gebruikersrekeninge vir e-pos of sosiale netwerke.
Ek het wel onlangs raakgesien hoedat sommige diensverskaffers op ‘n kreatiewe manier wel plan maak om hierdie soort probleem te oorkom. Natuurlik word dit nie soseer gedoen vir gesiggestremdes nie, maar vir baie ander mense wat ook seker al gekla het oor hulle probleem met hierdie prentjiekodes. Op Media24 se koerantwebwerwe is daar al ‘n geruime tyd ‘n funksie waar jy artikels per e-pos vir vriende kan aanstuur. Ek het onlangs gesien hoedat hulle vir hulle sekuriteitskode die gebruiker vra om ‘n eenvoudige optelsom te doen en die antwoord in die invulblokkie te tik om te bewys dat jy wel ‘n mens agter die rekenaar is nie ‘n gemorsposprogram of spambot nie. Ek het ook dieselfde verskynsel gesien by ‘n diensverskaffer wat gratis e-posrekeninge aan selfoongebruikers verskaf.
Baie dankie aan al julle rekenaarslimkoppe wat aandag geskenk het aan mense se klagtes met die prentjiekodes wat ‘n ernstige hindernis vir baie van ons was.
Ek hoop nou net nie dat die skrywers van gemorsposprogramatuur nie hulle programme ook gaan leer om somme te maak nie.

%d bloggers like this: