Mense van die duine

Harry, een van ons medebloggers, is ‘n storieverteller van formaat. Sy kortverhale het gereeld verskyn op Bierpense se joernaal Kekkel op die Plaas, te bsigtig by kekkel.wordpress.com. Sy kortverhale het nou so gewild geraak dat daar nou ‘n webjoernaal oopgemaak is met al Harry se stories in een plek. Gaan besigtig hierdie webjoernaal by duinemense.wordpress.com. Daar is ook ‘n snelskakel beskikbaar op my blogroll.

Sjinese mediamarteling

Die hele rassedebakel rondom die sogenaamde Reitz 4 begin nou erg op my senuwees te werk. Die ontgroeningsvideo wat hulle verfilm het en waaraan skoonmakers by die Reitz Manskoshuis deelgeneem het mag wel in swak smaak gewees het. Maar die manier hoedat die ANc en sy vennote op hierdie insident voorthamer is darem ook te erg. Dit wil voorkom asof hulle dit wil misbruik as ‘n stok om die Afrikaner mee by te kom. Kan hierdie dinge nie maar tot ‘n punt kom nie.

My hart gaan uit na Joost

Toe ek vanoggend na die onderhoud met Joost Van der Westhuizen op RSG luister kon ek nie anders as om jammer vir hom te voel nie. Joost het toe gebieg dat dit hy was wat in die skandvideo te sien was wat deur afpersers verfilm is en toe aan die media gelek is. Mag hy die klipperige pad na herstel suksesvol bewandel. En mag die media hom en sy gesin uitlos om privaat die skerwe op te tel.

Kring van die Spotters

Die Afrikaanse gemeenskap van bloggers hier op WordPress is ‘n interessante een. Die mense hier kom uit ‘n wye verskeidenheid agtergronde en hier is baie skryftalent onder hulle.
Ongelukkig is daar ook bloggers onder ons wat genot daaruit put om blogs oop te maak waar hulle ander bloggers bespot en slegsê.
Eers het hulle die deelnemers op www.bosparra.com bespot. Noudat Bosparra kalmer geword het is daar nou sommiges wat mekaar bespot en ook ander bloggers uitsonder. Ek was gister ontsteld om te sien hoe ou Klontkoppie en Vrinne vir Bierpens en Harry bespot het. Laasgenoemde is twee bloggers vir wie ek bewondering het. Bierpens vir sy skryfstyl en die manier hoe hy sy saak stel asook die werk waarmee hy besig is om ‘n platform vir Afrikaanse bloggers te bou waar artikels oor verskeie onderwerpe deur middel van etiketblaaie, oftewel tag pages aan mekaar geskakel word. En Harry vir sy kortverhale wat op Kekkel op die Plaas gepubliseer is. Harry weet hoe om ‘n storie te vertel.
Nee regtig, so kan dit nie aangaan nie. Daar is dinge daar buite wat veel ernstiger is as ons ou kleinlike geveggies op die blogs. Julle kan eerder julle talente gebruik om die Afrikaanse blogosfeer tot ‘n kragtige medium uit te bou wat kan opvoed sowel as vermaak.

Hoe nou gemaak met kabeldiewe

‘n tydjie gelede het EVKOM ‘n advertensieveldtog op TV gehad oor die nadelige gevolge wat kabeldiefstal op ons samelewing het. Ekonomiese en huishoudelike aktiwiteite word lamgelê as ons nie elektrisiteit het nie.
Gister was een van daardie dae. Die kabeldiewe het Maandagnag so elfuur se kant kabels uit ‘n kraglyn tussen Schweizer Reneke en Wolmaransstad gesteel. Die twee dorpe was gister heeldag sonder krag. Die kragtoevoer kon eers gisteraand laat herstel word.
Soos verwag kon word was daar groot chaos. Mense kon nie was of kos kook nie. Besighede kon nie normaal funksioneer nie. Boere kon nie water pomp vir hulle vee, besproeiing en huishoudelike behoeftes nie.
Die regering het onlangs ‘n nuwe wet bekragtig wat die koop en verkoop van tweedehandse goedere strenger reguleer. Dit lyk egter of dit nie veel doen om die kabeldiewe en hulle kopers af te skrik nie. Gegewe die ongerief en skade wat hulle veroorsaak wonder ek sommer maar net of mens nie dalk ‘n erger straf vir hulle moet toedien nie.

Van Casablanca tot die Kaap

Vroeër vanjaar het Johan Badenhorst en sy span van Voetspore faam weer een van hulle reise deur Afrika onderneem. In plaas daarvan dat hulle vanuit Suid-Afrika na hulle bestemming gereis het, het hulle hierdie keer hulle reis hoog in Afrika begin. Hulle het gereis vanaf Casablanca in Marokko tot by Kaapstad.
Ten spyte van vele probleme en vertragings was die reis wel suksesvol gewees. Vanaand het die eerste episode van die televisiereeks wat hulle op hul reis verfilm het gewys Die reeks word Vrydagaande om sesuur op SABC 2 uitgesaai.
Die span van Voetspore het met hulle vorige reeks, Van Gansbaai tot Gaboen, wat ook op televisie gebeeldsend is, aan die gewone Suid-Afrikaner wat nie dikwels in Afrika reis nie ‘n interessante kykie gegee na die landstreke waardeur hulle gereis het. Hierdie jongste reeks beloof om ook baie interessant te wees.

Jou helde en blogmaatjies in jou sak

Die gawe mense by WordPress.com het ons gister weer aangenaam verras toe hulle nuwe sagteware op WordPress.com geaktiveer het wat outomaties kan opmerk as jy metm jou selfoon ‘n wordpress.com blog besoek. Dan sal daar ‘n lekker klein en gemaklike weergawe van die blog op jou foon se webleser laai.
Hierdie funksie was al ‘n geruime tyd beskikbaar vir diegene wat WordPress se sagteware op selfgehuisveste “self-hosted” blogs gebruik. Bosparra.com was een van die bekende Afrikaanse blogs wat hierdie funksie vir ‘n lang tydjie al gebruik. Ons bloggers op wordpress.com se blogs was meestal ook bersoenbaar met selfone se weblesers, maar ons het nie toegang gehad tot die miniwerfsagteware wat die self-hosted blogs se eienaars kon gebruik nie. Gister het dit verander. Al die wordpress.com blogs is nou outomaties met hierdie miniwerfsagteware toegerus. Die blogs kan nou baie vinniger laai op jou foon. Dit is nou ook baie goedkoper om blogs op jou foon te lees.
Gelukkig is daar op hierdie miniwerf ook die keuse om nog steeds die volle webwerf op jou foon te besigtig soos voorheen.
My hartlike dank aan die span van WordPress.

Die ANC-regime stoomroller voort met naamsveranderings

Dit is onlangs bekend gemaak dat minstens vier bekende dorpe in Oos-transvaal se name verander gaan word. Hierdie dorpe is Nelspruit, Belfast, Machadodorp, en Watervalboven. Soos verwag kon word, was verskeie mense ongelukkig hieroor. Die DDA, die plaaslike sakekamers, die toerismeverenigings en selfs die Afrikanerbond, voorheen bekend as die Broederbond, wat die oorgawe van 1994 help moontlik maak het, het hierdie stap van die minister van kuns en kultuur veroordeel.
Een van die maniere hoe ons Afrikaners ons teen hierdie diefstal van ons plekname kan verset is om voort te gaan om steeds ons eie plekname te gebruik. Ons kan dit gebruik as ons met mekaar praat, as ons vir mekaar briewe of e-pos skryf, as ons aan gesprekke op radio of televisie deelneem, waneer ons toesprake lewer, as ons aan internetforums deelneem, op die blogs skryf of sosiale netwerke soos Facebook en Twitter gebruik. Dis verseker die kragtigste manier om ons erfenis te bewaar en lewend te hou.

Godsdiensonderrig op skool

Die laaste paar weke was daar ‘n hewige debat oor godsdiensonderrig op skool. Hierdie omstredenheid is veroorsaak deur Prof. George Claasen wat eers gedreig het om skole wat steeds godsdiensonderrig gee hof toe te sleep maar toe sy veldtog laat vaar het.
Ek het ook met groot belangstelling die debat gevolg op Bierpens se webjoernaal Kekkel op die Plaas. Het Christene werklik die reg om godsdiensonderrig op skool te gee? Moet ouers dit nie eerder self doen nie? Verseker stem ek saam met die stelling dat dit allereers die ouers se plig is om hulle kinders reg op te voed volgens die Woord. Daar moet egter ook ter wille van stabiliteit ook ‘n vorm van godsdiensonderrig op skool wees om die grondslag wat die ouers gelê het te versterk.
Die tweede vraag wat tydens hierdie debat opgekom het het gehandel oor wie nou verantwoordelikheid vir ons kinders se godsdiensonderrig moet aanvaar. Moet die regering dit doen? Beslis nie. Die kommunistiese ANC-regime kan onder geen omstandighede met hierdie taak toevertrou word nie. Al wat ons wel van die regering vra is dat hulle alle geloofsgemeenskappe die reg moet gee om self te kan besluit watter geloof of godsdiens hulle in hulle skole wil leer soos wat dit altyd die geval was. Verder moet kerke, gemeenskappe en beheerrade en ouerkomitees by skole self hierdie verantwoordelikheid opneem oor hoe godsdiensonderrig prakties toegepas gaan word.
Verder moet Godsdiensonderrig gegee word deur mense wat vir die taak toegerus is en wat self seker van hulle geloof is. As die onderwyser of onderwyseres self verward is, moet hulle nie godsdiensonderrig gee nie.
Hierdie debat is nog lank nie verby nie. Ons sal nog ‘n lang paadjie moet stap om die regte oplossing vir hierdie dilemma te kry.

Hoes en betaal in die duisternis

EVKOM het gister tydens ‘n parlementêre verhoor gevra vir ‘n verhoging van kragtariewe van 45% jaar op jaar tot 2012. As hulle hul sin kry, styg die prys wat ek en jy vir elektrisiteit betaal vir die volgende drie jaar met 45% per jaar. In 2010 betaal ons 45% verhoging op vanjaar se tarief, in 2011 betaal ons 45% op 2010 se tarief en in 2012 betaal ons 45% verhoging op 2011 se tarief. Al julle slim mense wat kan somme maak sal gou sien dat dit op die ou end ‘n aardige bedraggie gaan beloop. DOm alles te vererger te maak is daar voorstelle gemaak dat die sogenaamde rykes weereens meer moet opdok sodat die sogenaamde armes nie die volle verhoging hoef te betaal nie. Baie mense het vanoggend op RSG se sms-lyn gevra hoe hulle gaan bepaal wie is ryk en wie is arm.
Hierdie prysverhoging gaan die grootste deel van ons ekonomie verwoes. Kleiner besighede wat vir baie van ons mense werk verskaf sal hulle deure moet sluit omdat hulle nie noodwendig hulle dienste en produkte se pryse dienooreenkomstig kan verhoog nie. Dit gaan baie meer mense werkloos laat.
Selfs ons groot fabrieke, veral metaalsmelters- en verwerkers gaan ook ernstig geknou word omdat hulle nywerhede groot hoeveelhede elektrisiteit gebruik. Om nie eers van die myne te praat nie.
Die boere gaan ook swaar kry. Waterpompe, droërs en pakhuise is van die toerusting wat die meeste krag gebruik. Boere sal van hulle bedrywighede moet afskaal, werkers moet afbetaal of selfs die boerdery moet stop as hulle nie meer die koste kan dra nie.
Hierdie dinge lei op sy beurt na grootskaalse armoede en onrus.
Dames en here, ek is erg bekommerd.